Havanı çirkləndirən metaləritmə sexi cəzalanıb

Sumqayıtda yerləşən Etilen-Polietilen zavodu ərazisinə qaz və tüstünün yayılması ilə bağlı Ekologiya və Təbii Sərvətlər Nazirliyinə daxil olan məlumat əməkdaşlarımız tərəfindən yerində araşdırılıb. Aparılan monitorinq və araşdırma zamanı ətrafa yayılan iy-qoxunun yaxınlıqda yerləşən “TAC Metal” MMC-yə məxsus metaləritmə sahəsində formalaşdığı məlum olub. Bunu jurnalistlərə açıqlamasında 4 saylı Regional ekologiya idarəsinin rəisi Mübariz Vəliyev bildirib.

O qeyd edib ki, sözügedən ərazinin atmosfer havasından götürülən nümunələr üzərində aparılan analizlərin nəticələrinə görə etil-benzolun qatılığının normadan 1,4 dəfə artıq olduğu müəyyən edilib.

“Faktla bağlı MMC-nin direktoru Müslüm Abbasov barəsində akt və protokol tərtib olunub və o, vəzifəli şəxs qismində 3000 manat məbləğində cərimə edilib. Gələcəkdə belə halların baş verməməsi üçün MMC-nin direktoruna icrası məcburi olan müddətli “məcburi göstəriş” verilib”.