Ekoloqların (meteoroloqların) proqnozu bu dəfə də özünü doğrultdu, bəzi aztapılan informasiya agentliyi və saytların ehtimalları növbəti dəfə yalan çıxdı

Az oxunan və oxucu qazanmaq naminə yanlış və qərəzli şərhləri ilə diqqət çəkməyə çalışan tanınmamış sayt rəhbəri bu dəfə də məyus olub. Davamlı olaraq Ekologiya və Təbii Sərvətlər Nazirliyinin müxtəlif səpkili, o cümlədən hava proqnozu ilə bağlı məlumatlarını qəsdən ədalətsiz şəkildə yozmağı özünə peşə seçən sayt rəhbərinin diqqətinə meteoroloji stansiyalardan fevralın 7-9-na olan hava proqnozu ilə bağlı daxil olmuş faktiki məlumatları təqdim edirik. Bu faktlarla qərəzini nümayiş etdirənlərin yalanlarını ifşa etməyə, özlərini isə yenə də məyus qoymağa məcburuq.  

Fevralın 07-08-də müşahidə olunmuş faktiki hava şəraiti haqqında məlumat

Milli Hidrometeorologiya Departamenti tərəfindən əvvəlcədən xəbər verildiyi kimi fevralın 07-dən ölkə ərazisində hava şəraiti kəskin dəyişmiş, qeyri-sabit, yağıntılı olmuş, əksər yerlərdə sulu qar, qar yağmış, güclü şimal-qərb küləyi əsmişdir. Qeyri-sabit hava şəraiti fevralın 9-u səhər saatlarınadək davam etmiş, havanın temperaturu ötən günlərlə müqayisədə 8-12 dərəcə aşağı enmişdir.

Abşeron yarımadasındafevralın 7- 8-də arabir yağış yağmış, 8-də isə Bakının bəzi ərazilərində, Biləcəridə, Sulutəpədə, Xırdalanda, Qaradağda yağış sulu qara, qara keçmiş, düşən yağıntının miqdarı 1-7 mm-ə çatmışdr.

Naxçıvan MR-da hava şəraiti yağıntılı olmuş, qar yağmış, düşən yağıntının miqdarı 5-23 mm, qar örtüyünün hündürlüyü 4-10 sm, Kiçik Qafqazda qar yağmış, düşən yağıntının miqdarı 10-17 mm, qar örtüyünün hündürlüyü 5-11 sm, Qazax-Gəncə zonasında hava şəraiti yağıntılı olmuş, qar yağmış, düşən yağıntının miqdarı 8-13 mm, Böyük  Qafqazda yağıntılı olmuş, qar yağmış, düşən yağıntının miqdarı 6-19 mm, qar örtüyünün hündürlüyü 2-8, dağlıq rayonlarda isə 34-43 sm, Mərkəzi Aran rayonlarında yağıntılı olmuş, qar yağmış, düşən yağıntının miqdarı 5-25 mm, Lənkəran-Astara zonasında yağıntılı olmuş, qar yağmış, düşən yağıntının miqdarı 10-37 mm, qar örtüyünün hündürlüyü 8-17 sm olmuşdur.

Fevralın 5-də ETSN-nin rəsmi saytında dərc olunan və özünü doğrultmuş, lakin bu aztapılan məlumat  saytının “doğrulmadı” deyə yazdığı hava şəraitinin dəyişəcəyi barədə xəbərdarlıq proqnozu bu məzmunda idi: 

Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə Bakıda və Abşeron yarımadasında  fevralın 07-dən hava şəraitinin kəskin dəyişəcəyi, arabir yağıntılı olacağı gözlənilir. Güclü şimal-qərb küləyi əsəcək. Havanın temperaturu ötən günlərlə müqayisədə 8-10 dərəcə aşağı enəcək. Qeyri-sabit hava şəraiti fevralın 09-dək davam edəcək.

Fevralın 07-də qərb rayonlarından başlayaraq hava şəraitinin kəskin dəyişəcəyi, yağıntılı olacağı, bəzi yerlərdə sulu qar, qar yağacağı, ayrı-ayrı yerlərdə intensiv olacağı gözlənilir. Qərb küləyi əsəcək, bəzi yerlərdə arabir güclənəcək. Havanın temperaturu ötən günlərlə müqayisədə 8-10 dərəcə aşağı enəcək. Dağlıq rayonlarda yolların buz bağlama ehtimalı var. Qeyri-sabit hava şəraiti fevralın 09-u gündüzədək davam edəcək.  

(http://eco.gov.az/az/xeberler/hava-seraitinin-deyiseceyi-barede-xeberdarliq-4306)