Kür və Araz transsərhəd çaylarında keçirilən monitorinqlərin nəticələri (avqust ayının II ongünlüyü üçün)

Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə avqust ayının II ongünlüyü üçün növbəti monitorinqləri həyata keçirmişdir.
Avqust ayının II ongünlüyündə Kür çayında suyun sərfi avqust ayının I ongünlüyünə nisbətən 12,1 m3/san azalaraq 87,5 m3/san təşkil etmişdir. Monitorinqin nəticələrinə əsasən Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olması müşahidə olunmuşdur. Suyun tərkibindəki spesifik çirkləndiricilərdən fenol və mis birləşmələri yol verilən qatılıq həddini (YVQH) keçmişdir.
Belə ki, Şıxlı-2 məntəqəsində fenollar 2, mis birləşmələri 3, Ağstafaçayda və Ağstafaçay su anbarında fenollar 3, mis birləşmələri 4 dəfə YVQH-ni keçmişdir.
Avqust ayının II ongünlüyündə aparılan monitorinqlərin nəticələrinə görə Araz çayı üzrə Horadiz məntəqəsində suyun əsas çirkləndiricilərindən olan fenollar 4, mis birləşmələri 2, I Şahsevəndə fenollar 2, mis birləşmələri 3, Bəhramtəpədə isə fenollar 3, mis birləşmələri isə 4 dəfə isə YVQH-ni keçmişdir.
Suyun oksigen rejimi bütün məntəqələrdə 5,76-6.19 mq/l arasında olmaqla sanitar norma daxilində dəyişmişdir.