“Ekologiya mövzusunun kütləvi informasiya vasitələrində işıqlandırılmasına dəstək” birgə layihəsi üzrə yazılmış ən yaxşı məqalə və telesüjetlərin qalibləri mukafatlandırıldı

06 iyun 2011-ci il tarixdə Ekologiya və Təbii Sərvətlər Nazirliyi Azərbaycan Respublikasının Prezidenti yanında Kütləvi İnformasiya Vasitələrinə Dövlət Dəstəyi Fondu ilə birlikdə 05 iyun Ümumdünya ətraf mühit günü ilə əlaqədar jurnalistlər arasında elan olunmuş “Ekologiya mövzusunun kütləvi informasiya vasitələrində işıqlandırılmasına dəstək” birgə layihəsi üzrə yazılmış ən yaxşı məqalə və telesüjetlərin qaliblərini mükafatlandırdı.
Qeyd edək ki, Azərbaycan Respublikasının jurnalistəri tərəfindən ekoloji vəziyyətin sağlamlaşdırılması, təbii sərvətlərdən səmərəli istifadə edilməsi, biomüxtəlifliyin mühafizəsi, təbiətdən davamlı istifadənin təmin olunması, təbliğ edilməsi, daha da inkişaf etdirilməsi və əhalinin məlumatlandırılması məqsədilə 14 aprel 2011-ci il tarixdə elan olunmuş müsabiqəyə 62 məqalə və 5 telesüjet təqdim olunmuşdur.
Təqdim olunmuş məqalə və telesüjetlər ekspertlər tərəfindən qiymətləndirilmiş, müvafiq istiqamətlər üzrə qaliblər müəyyənləşdirilmişdir.
Beləliklə, komissiya üzvləri tərəfindən “Ekologiya mövzusunun kütləvi informasiya vasitələrində işıqlandırılmasına dəstək” birgə layihəsinə təqdim olunmuş məqalə və telesüjetlərin müəlliflərinə ekoloji təhlükəsizliyin təminatı, “yaşıl” texnologiyanın tətbiqi, mövcud ekoloji problemlər, meşələrin artırılması və mühafizəsi, biomüxtəliflik nominasiyaları üzrə mükafatlar təqdim edilmişdir. Bundan əlavə daha 15 iştirakçı həvəsləndirici mükafatlarla təltif olunmuşdur.