Bayıl yamacı-20-ci sahə arasındakı ərazidə iməcilik keçirilmişdir

27 noyabr 2010-cu il tarixində Ekologiya və Təbii Sərvətlər Nazirliyi tərəfindən Bayıl yamacı-20-ci sahə arasındakı ərazidə iməcilik keçirilmişdir. İməcilikdə Nazirliyin əməkdaşları ilə birlikdə Kütləvi İnformasiya Vasitələrinin nümayəndələri də iştirak etmişlər.
Bu gün keçirilən iməcilikdə Bayıl yamacı-20-ci sahə arasındakı ərazinin 2 hektar sahəsində, ümumilikdə 2,5-3 mindən çox ağac və kol bitkisi (eldar şamı, tuya, üzüm ) əkilmişdir.
Sözügedən ərazinin suvarılması üçün artıq 6 çən quraşdırılmış, o cümlədən daha 4 çənin quraşdırılması nəzərdə tutulmuşdur. Ərazi qumsal sahə olduğundan burada suvarma həftədə 2 dəfə olmaqla həyata keçirilir.
Ümumiyyətlə, gələn yaz mövsümünün sonunadək Bayıl yamacının 60 hektar sahəsində 120 min ədəd müxtəlif cinslərdən olan ağac və kol bitkisinin əkilməsi nəzərdə tutulub. 2010-cu ilin yazından başlayaraq bu günədək isə ərazinin 15 hektar sahəsində 35 min ədəd ağac və kol bitkisi əkilmişdir.
Qeyd edək ki, ağacəkmə ilə bağlı iməciliklər Respublikanın digər ərazilərində də keçirilmişdir.
Nazirlik payız mövsümü ilə əlaqədar Respublika ərazisində ağacəkmə ilə bağlı iməcilikləri davam etdirir.