Azərbaycan Dövlət Pedaqoji Universitetində maarifləndirici seminar keçirilmişdir

07 noyabr 2013-cü il tarixində Azərbaycan Dövlət Pedaqoji Universitetində təhsil alan tələbələrin ekoloji maarifləndirilməsi və ətraf mühit sahəsində bilik və bacarıqlarının artırılması məqsədi ilə maarifləndirici seminar keçirilmişdir.
Tədbir Ekologiya və Təbii Sərvətlər Nazirliyi ilə sözügedən universitet arasında qarşılıqlı əməkdaşlıq çərçivəsində yaradılmış “Ekoklub”un təşkilatçılığı ilə baş tutmuşdur.
Görüşdə Nazirliyin mütəxəssisləri, sözügedən Universitetin rəhbərliyi və 200-ə yaxın tələbə iştirak etmişdir.

Tədbirdə “Ekoklub”un yaradılmasının məqsədi, dövlətin ekologiya sahəsində həyata keçirdiyi uğurlu siyasət və bu istiqamətdə gənclərin fəal rolundan danışılaraq, gənclərin ətraf mühit sahəsində bilik və bacarıqlarının artırılmasının vacibliyi diqqətə çatdırılmışdır.

Tədbirdə son on ildə ətraf mühitin mühafizəsi və ekoloji vəziyyətin yaxşılaşdırılması istiqamətində Ekologiya və Təbii Sərvətlər Nazirliyi tərəfindən həyata keçirilmiş tədbirləri özündə əks etdirən film nümayiş olunmuş, Nazirliyin mütəxəssisləri tərəfindən interaktiv qaydada təqdimatla çıxışlar olunmuş, həmçinin tələbələri maraqlandıran suallar cavablandırılmışdır.

Məlumat üçün qeyd edirik ki, ölkədə fəaliyyət göstərən 30-dan artıq ali təhsil müəssisəsində “Ekoklub”ların yaradılmasının əsas məqsədi ətraf mühit və təbii sərvətlərin milli dəyər kimi gələcək nəsillər üçün qorunub saxlanması ideyalarının gənclər arasında təbliği, həmçinin, Nazirliyin gələcəkdə yüksək ixtisaslı kadr heyətinin formalaşdırılması, ali təhsil müəssisələrinin ətraf mühit sahəsində təhsil alan tələbələri ilə daimi əlaqənin yaradılması və təbliğat sahəsində geniş şəbəkənin formalaşdırılmasından ibarətdir.