Ekologiya və Təbii Sərvətlər Nazirliyinin nümayəndələri ilə birlikdə Azərbaycan Hava və Ekstremal İdman Növləri Federasiyasının fəalları “Heydər zirvəsi”nə yürüş edib

Azərbaycan Hava və Ekstremal İdman Növləri Federasiyasının ekspedisiya qrupu Ümummilli Lider H.Əliyevin 86 illiyi ilə əlaqədar 7 may 2009-cu il tarixdə Böyük Qafqaz dağ silsiləsinin Qızıl Qaya massivində yerləşən “Heydər zirvəsi”nə yürüşə başlayıb.
Yürüşə Azərbaycan Hava və Ekstremal İdman Növləri Federasiyasının fəalları ilə birlikdə Ekologiya və Təbii Sərvətlər Nazirliyinin nümayəndələri də qoşulub.
Ekspedisiya qrupunun mayın 7-də Bakı şəhərindən başlanan yürüşü mayın 8-də “Heydər zirvəsi”nin yerləşdiyi Böyük Qafqaz dağ silsiləsinin Qızıl Qaya massivinin ətəklərində davam etmiş, günün sonunda yürüş iştirakçıları çətin keçidləri olan zirvəyə çatılmasına hazırlıq üçün həmin ərazidə düşərgə qurmuşlar.
Xatırladaq ki, 2008-ci ildə də Ümummilli Lider H.Əliyevin ad günü ərəfəsində Azərbaycan Hava və Ekstremal İdman Növləri Federasiyasının fəalları Ekologiya və Təbii Sərvətlər Nazirliyinin nümayəndələri ilə birlikdə “Heydər zirvəsi”nə yürüş etmişdilər.