Sabirabad rayonunun Həşimxanlı, Quruzma və Şəhriyar kəndlərinin əhalisi ekoloji cəhətdən təmiz içməli su ilə təmin olunub

Azərbaycan Respublikası Prezidenti tərəfindən 2007”“ci il 20 iyun tarixində təsdiq olunmuş “Əhalinin ekoloji cəhətdən təmiz su ilə təminatının yaxşılaşdırılması ilə əlaqədar bəzi tədbirlər haqqında” Sərəncamda Kür və Araz çaylarının suyundan içməli su kimi istifadə edən bir sıra yaşayış məntəqələrinin ekoloji cəhətdən təmiz su ilə təmin edilməsi nəzərdə tutulub.
Sərəncamın icrası nəticəsində keyfiyyətli su imkanları məhdud olan 100 kənddə modul tipli su təmizləyici qurğuların quraşdırılması hesabına 166 min kənd əhalisinə verilən su Ümumdünya Səhiyyə Təşkilatının normalarına uyğun təmizlənəcək.
Sərəncamın icrası olaraq artıq 2007-ci ildə Zərdab, Kürdəmir, Yevlax, İmişli, Sabirabad, Saatlı, Salyan və Neftçala rayonlarının içməli sudan əziyyət çəkən 50 yaşayış məntəqəsinin 55 mindən çox əhalisi təmiz içməli su ilə təmin olunub.
Hazırda Ağcabədi, Biləsuvar, Sabirabad, Kürdəmir, Yevlax, Zərdab, İmişli, Saatlı, Salyan, Neftçala, Naxçıvan MR-nın Babək və Şərur rayonlarının 50 yaşayış məntəqəsinə qənaət olunmuş vəsait hesabına 10 kənd də əlavə olunmaqla, ümumilikdə, 60 yaşayış məntəqəsinin 140 min əhalisinin keyfiyyətli su ilə təmin edilməsi istiqamətində işlər yekunlaşmaq üzrədir.
2009-cu il 05 mart tarixində Sabirabad rayonunun Həşimxanlı, Quruzma və Şəhriyar kəndlərində Cənubi Koreyanın “Hyundai” şirkətinin istehsalı olan ən müasir “osmos” texnologiyalı su təmizləyici qurğuların açılış mərasimi keçirilib.
Gün ərzində 50 m3 su təmizləmə gücünə malik modul tipli qurğunun fəaliyyəti nəticəsində Həşimxanlı kəndinin 2380 nəfər əhalisi 15 bulaq, gün ərzində 40 m3 su təmizləmə gücünə malik modul tipli qurğunun fəaliyyəti nəticəsində Quruzma kəndinin 2000 nəfər əhalisi 15 bulaq, gün ərzində 50 m3 su təmizləmə gücünə malik modul tipli qurğunun fəaliyyəti nəticəsində Şəhriyar kəndinin 2600 nəfər əhalisi isə 11 bulaq vasitəsilə təmiz içməli sudan istifadə edəcək.