Dövlət Ekoloji Təhlükəsizlik Xidmətinin Məlumatı

Xırdalan şəhəri, Seyid Əzim Şirvani küçəsində fəaliyyət göstərən daş emalı sexindən ətrafa tozun yayılması ilə bağlı Dövlət Ekoloji Təhlükəsizlik Xidmətinə daxil olan şikayət 4 saylı Regional Ekologiya və Təbii Sərvətlər İdarəsi və Xəzər Kompleks Ekoloji Monitorinq İdarəsinin əməkdaşları tərəfindən yerində araşdırılıb.

Xidmət rəsmisi Asif Məcidov bildirib ki, sexdə ekoloji tələblərə əməl olunması vəziyyəti araşdırılan zaman sexdən atmosfer havasına normadan artıq tozun atıldığı müəyyən edilib.

“Faktla bağlı akt tərtib olunub. Sexin mülkiyyətçisi Nabat Cəfərovanın vəzifəli şəxs qismində 2500 manat məbləğində cərimə olunması ilə bağlı qanunamüvafiq tədbirlər görülür.

Eyni zamanda ərazidə ekoloji vəziyyətin yaxşılaşdırılması, sakinlərin narahatlığının aradan qaldırılması məqsədilə mülkiyyətçiyə icrası məcburi olan “Ekoloji tələb” verilib.”