Xəbərlər

“Çex modeli” üzrə nişanlanma işləri davam edir

17 Sentyabr 2024, 16:35

Ekologiya və Təbii Sərvətlər Nazirliyinin Çex Respublikasının ölkəmizdəki səfirliyi ilə əməkdaşlıq proqramı çərçivəsində 9-13 sentyabr tarixlərində Hirkan və Altıağac Milli Parklarında çex mütəxəssisi İvo Dokoupili tərəfindən milli parkların əməkdaşlarına treyninqlər təşkil olunub və təyin olunan marşrutlar üzrə ümumi uzunluğu 15 km olan nişanlanma işləri aparılıb.

Qeyd edək ki, 2019-cu ildə Şahdağ Milli Parkının İsmayıllı bölməsinin Talıstan meşəbəyliyi və Hirkan Milli Parkının Sağlam həyat marşrutları üzrə çex mütəxəssisləri tərəfindən milli parkların əməkdaşlarına treyninqlər keçirilib və ümumi uzunluğu 14 km olan turist cığırlarının “çex modeli” üzrə nişanlanma işləri aparılıb.

Bir çox ölkələrdə tətbiq olunan “çex modeli” üzrə turist marşrutlarının nişanlanması işlərinin digər milli parklarda da aparılması planlaşdırılır. Bu nişanlar turistlərin cığırlardan kənara çıxmamasına və marşrut üzrə rahat hərəkət etmələrinə xidmət göstərir.