Könüllülər üçün "Go Camp" layihəsi davam edir

Ekologiya və Təbii Sərvətlər Nazirliyi və Azərbaycan Respublikasının Gənclər Fondunun dəstəyi, Azərbaycan Könüllü Təşkilatları İttifaqının təşkilatçılığı ilə könüllülər üçün keçirilən "Go Camp" piknik layihəsi davam edir.

Layihə çərçivəsində könüllülərin növbəti səfəri Şirvan Milli Parkına təşkil edilib. Gənclər milli parkın təbiəti ilə yaxından tanış olub, flora və faunası haqqında məlumatlanıblar. Eyni zamanda gənclər müxtəlif oyun növləri və idman yarışları ilə asudə vaxtlarını dəyərləndiriblər.

“Yaşıl dünya naminə həmrəylik ili” çərçivəsində keçirilən bu layihənin əsas məqsədi könüllülər arasında sağlam həyat tərzinin formalaşdırılması, onlar arasında birliyin nümayişi, eyni zamanda ətraf mühitin mühafizəsində gənclərin rolunun artırılması və aktiv fəaliyyət göstərən Azərbaycan könüllülərinin fəaliyyətinin qiymətləndirilməsidir.