Xəbərlər

7 sentyabr - Beynəlxalq mavi səma üçün təmiz hava günü

07 Sentyabr 2024, 09:12

“Mavi səma üçün təmiz hava günü” Birləşmiş Millətlər Təşkilatı tərəfindən 2019-cu ildə təsis edilmişdir. Bu gün hər il sentyabrın 7-də qeyd olunur və təmiz havanın insan sağlamlığı, ekosistemlər və iqlim üçün nə qədər vacib olduğunu vurğulamaq məqsədi daşıyır.

Bu gün münasibətilə bir çox ölkədə müxtəlif maarifləndirmə kampaniyaları, seminarlar, təbiət yürüşləri, ictimai forumlar və aksiyalar təşkil olunur. Mavi səma və təmiz hava üçün fərdlər və cəmiyyətlər tərəfindən atıla biləcək addımlar vurğulanır.

Siz də "Mavi səma üçün təmiz hava günü"nə dəstək verərək hava keyfiyyətinin yaxşılaşdırılmasına töhfə verə bilərsiniz. Piyada yürüş, velosiped sürmək, ictimai nəqliyyatdan, elektrik avtomobillərdən istifadə və enerjiyə qənaət etmək kimi addımlarla dəstəyinizi göstərə bilərsiniz.

Qeyd edək ki, Ekologiya və Təbii Sərvətlər Nazirliyi tərəfindən “Mavi səma üçün təmiz hava günü” münasibətilə Abşeron və Şirvan Milli Parklarında “açıq qapı” günü elan edilib. Şirvan Milli parkında flaminqoları müşahidə edə, Abşeron Milli Parkında isə xüsusi interaktiv və maraqlı tədbirdə iştirak edərək günü yaddaqalan edə bilərsiniz.