Azərbaycanda Xəzər günü maraqlı və interaktiv tədbirlərlə qeyd olundu

Xəzər Gününün əhəmiyyətinə diqqət çəkmək məqsədilə Ekologiya və Təbii Sərvətlər Nazirliyinin təşkilatçılığı, Dənizkənarı Bulvar İdarəsinin, COP29 Məlumat Mərkəzinin, “Ekosfera" sosial-ekoloji mərkəzin dəstəyi ilə Dənizkənarı Milli Parkda maraqlı və interaktiv tədbir təşkil olunub.

Tədbir zamanı ölkə ərazisindəki milli parkların stendləri sərgilənib, Xəzər sahillərində keçirilən təmizlik aksiyaları ilə bağlı təşviqedici videoçarxlar nümayiş olunub, interaktiv zona yaradılaraq müxtəlif yaş qrupundan olan uşaqlar və gənclər üçün oyunlar keçirilib, “Dəniz həyatı” adlı immersiv şou və iştirakçılar arasında ekoviktorina təşkil edilib.

Eyni zamanda, həvəskar rəssamlar və könüllülər çəllək, kətan və ekoçantalar üzərində Xəzər dənizini əks etdirən rəsmlər çəkib, ziyarətçilər üçün yoqa sessiyası keçirilib.

Tədbir açıq havada dəyirmi masa ilə davam edib, mütəxəssislər və ekspertlər Xəzər dənizinin səviyyə tərəddüdləri, “Xəzər dənizinin dəniz ətraf mühitinin mühafizəsi haqqında Çərçivə Konvensiyası”ndan irəli gələn vəzifələrin icra vəziyyəti, Xəzərin hidrometeorologiyası, Xəzər dənizində aparılan ekspedisiyalar, dənizin çirklənmə səbəbləri və qarşısının alınması istiqamətində görülmüş və görüləcək işlər barədə müzakirələr aparıblar.

Sonda IDEA İctimai Birliyinin dəstəyi ilə çəkilmiş “Qızılağac Milli Parkı”na həsr olunmuş film nümayiş olunub.