Ümumrespublika Təmizlik Marafonu çərçivəsində növbəti təmizlik aksiyası Lənkəranda keçirilib

“Kapital Bank”ın 150 illik yubileyi münasibətilə “Qırmızı Ürəklər Fondu” ilə birgə həyata keçirdiyi “Sıfır Tullantı” həmrəylik marafonu çərçivəsində növbəti iməcilik keçirilib.

Marafon iştirakçıları Ekologiya və Təbii Sərvətlər Nazirliyi tərəfindən həyata keçirilən “Təmiz ölkəm” ümumrespublika təmizlik aksiyası çərçivəsində Xəzər dənizinin Lənkəran sahilini tullantılardan təmizləyiblər.

Layihənin məqsədi dəniz və çay sahillərində, dağ-meşə ərazilərində təmizliyə riayət olunmasını təbliğ etmək, məişət tullantıları ilə zibillənmənin qarşısını almaq, ictimaiyyəti ətraf mühitin mühafizəsinə cəlb etmək və hər kəsi öz atdığı tullantıları toplamağa sövq etməkdir.

Lənkəran şəhərində baş tutan aksiyada Nazirliyin regional idarələrinin əməkdaşları, “Kapital Bank”ın Lənkəran–Astara iqtisadi rayonunda fəaliyyət göstərən filiallarının əməkdaşları, “Qırmızı Ürəklər” Fondunun nümayəndələri tərəfindən 600 kq-a yaxın tullantı toplanaraq ərazidən daşınıb.