15 aprel “Ekoloji Bilik Günü” ilə əlaqədar regionlarda maarifləndirici görüşlər təşkil olunub

15 aprel “Ekoloji Bilik Günü” ilə əlaqədar regional ekologiya və təbii sərvətlər idarələrinin əməkdaşları tərəfindən regionlarda yaşayan əhalinin ətraf mühitin mühafizəsi sahəsində məlumatlılığını artırmaq, bu sahəyə məsuliyyət hissini aşılamaq məqsədilə maarifləndirici görüşlər keçirilib.

“Yaşıl dünya naminə həmrəylik ili" çərçivəsində təşkil olunan görüşlər zamanı Azərbaycan Dövlət Aqrar Universitetinin, Füzuli rayonu M.M.Xəzani adına Musiqi Təmayüllü Gimnaziyanın tələbələri, Bərdə, Salyan, Qəbələ, Ağdam, İsmayıllı, Tərtər Ağcabədi, Beyləqan rayonlarının məktəb şagirdləri ətraf mühitin mühafizəsi, təbii sərvətlərdən səmərəli istifadə sahəsində məlumatlandırılıb.

Tədbirlər zamanı şagird və tələbələrə ekoloji biliklərə yiyələnmənin vacibliyi, ətraf mühitin mühafizəsində uşaqların rolu, sudan səmərəli və qənaətlə istifadə, tullantıların düzgün idarə olunması və s. mövzularda məlumatlar verilib, mövzular ətrafında verilən suallar cavablandırılıb.