Göygöl və Şahdağ milli parklarına gənclər üçün maarifləndirici səfərlər təşkil edilib

Ekologiya və Təbii Sərvətlər Nazirliyi və Azərbaycan Texnologiya Universitetinin birgə təşkilatçılığı ilə “Yaşıl dünya naminə həmrəylik ili” çərçivəsində tələbələrlə maarifləndirici görüşlər keçirilib.

Tələbələr “Biomüxtəliflik və iqlim dəyişmələri” mövzusunda elmi-praktiki seminarda iştirak edib, mütəxəssislər tərəfindən onlara mövzu ilə bağlı məlumatlar verilib, daha sonra Göygöl Milli Parkına səfər təşkil edilib. Gənclər milli parkın təbiəti, fauna və flora aləmi ilə yaxından tanış olub, xüsusi mühafizə olunan təbiət əraziləri barədə məlumatlandırılıblar.

Eyni zamanda, “Regional İnkişaf” İctimai Birliyinin könüllüləri Şahdağ Milli Parkının İsmayıllı bölməsinə ekskursiya edib, milli parkın zəngin biomüxtəlifliyi ilə tanış olub, zubrları, maralları seyr ediblər.