Milli Hidrometeorologiya Xidmətində Azərbaycan Tibb Universitetinin tələbələrinə təlimlər keçirilib

Milli Hidrometeorologiya Xidmətinin Situasiya mərkəzində Azərbaycan Tibb Universitetinin ll və III kurs tələbələrinə hidrometeorologiya sahəsində biliklərin artırılması, iş prosesi ilə yaxından tanış olmaq, müasir cihaz və avadanlıqlarda işləmə vərdişlərinin qazanılması məqsədilə Xidmətin mütəxəssisləri tərəfindən təlimlər keçirilib.

Təhlükəli hidrometeoroloji hadisələrin idarə olunmasında “Erkən Xəbərdarlıq Sistemi”nin inkişaf etdirilməsi ilə əlaqədar Xidmətin müşahidə şəbəkəsinin moderniziasiyası istiqamətində görülmüş işlər, eyni zamanda fəaliyyət göstərən dopler radar sistemi, onun iş prinsipi barədə tələbələr geniş məlumat əldə ediblər.

Tələbələrə “Hidroloji müşahidələrin təşkili”, hər il periodik aparılan qarölçmə işləri barədə təqdimat nümayiş etdirilib. Çay hövzələrində xüsusi marşrutlar üzrə hesablanmış qar örtüyünün hündürlüyü, sıxlığı və sululuğunun təyin edilməsi haqqında məlumat verilib.

Təlim tələbələr tərəfindən böyük maraqla qarşılanıb, onları maraqlandıran suallar Xidmətin əməkdaşları tərəfindən cavablandırılıb.