Respublikanın çaylarında və transsərhəd çaylarda mövcud vəziyyət

Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə ötən günlər ərzində Lənkəran-Astara bölgəsinə yağan intensiv yağışlar nəticəsində bu ərazidən axan Lənkərançay-Lənkəranda suyun səviyyəsində 160, Lənkərançay-Sifidorda 101, Vəşərüçay-Daştatükdə və Viləşçay-Şıxlarda isə 78 sm artım qeydə alınıb.
Hazırda ən yüksək sululuq Lənkərançay-Astara bölgəsi çaylarında müşahidə olunmaqla ongünlük normanın 300-700, Böyük Qafqazın Quba-Xaçmaz bölgəsi çaylarında 80-140, Kiçik Qafqazın çaylarında 40-90 faizini təşkil edir.
Tranzit çaylarda hazırki vəziyyət
Oktyabrın 20-də Kür çayının Qıraqkəsəmən məntəqəsində suyun səviyyəsində 4 sm artım müşahidə olunub. Hazırda məntəqədə su sərfi 165 m3/s olmaqla ongünlük normanın 97 faizini təşkil edir. 2013-cü ildə bu rəqəm 137 m3/s olmaqla ongünlük normanın 81 faizini təşkil edib.
Qanıx çayının Əyriçay məntəqəsində suyun səviyyəsində 2 sm azalma müşahidə olunub. Hazırda məntəqədə su sərfi 63 m3/s olmaqla, ongünlük normanın 59 faizini təşkil edir. 2013-cü ildə də bu göstərici 114 m3/s təşkil edərək ongünlük normanın 107 faizinə bərabər olub.
Kür çayının aşağı axınında hazırki vəziyyət
Oktyabrın 20-də Kür çayının aşağı axınında suyun səviyyəsində əsasən mühüm dəyişiklik müşahidə olunmayıb. Belə ki, Kür çayının Surra məntəqəsində 1, Şirvanda 8 sm azalma, Bankədə 47, Araz çayının Novruzlu məntəqəsində 2 sm artım qeydə alınıb, Salyanda isə suyun səviyyəsində dəyişiklik müşahidə olunmayıb.
Hazırda Surra məntəqəsində suyun səviyyəsi 286 sm (2013-cü il oktyabrın 20-də 327 sm), Şirvanda 117 sm (2013-cü il oktyabrın 20-də 172 sm), Salyanda 65 sm (2013-cü il oktyabrın 20-də 122 sm), Bankədə 209 sm (2013-cü il oktyabrın 20-də 189 sm), Araz çayının Novruzlu məntəqəsində isə 25 sm (2013-cü il oktyabrın 20-də 91 sm) təşkil edir.