Növbəti ATMA-YARAT-SAT sosial layihəsi keçiriləcək

“Təmiz Şəhər” ASC-nin təşkilatçılığı, Sosial Xidmətlər Agentliyi, Ekologiya və Təbii Sərvətlər Nazirliyi, Azərxalça ASC, Azərbaycan Yaradıcı Sənayelər Federasiyası və Azərbaycan Jurnalistlər Şəbəkəsi İctimai Birliyinin dəstəyi ilə ənənəvi olaraq keçirilən ATMA-YARAT-SAT sosial layihəsinə Araz Supermarketlər şəbəkəsi də qoşulub.

Layihə çərçivəsində əlilliyi olan insanlar və Vətən müharibəsində sağlamlığını itirən yaradıcı şəxslər düzəltdikləri əl işlərini mütəmadi olaraq ARAZ supermarketlər şəbəkəsinin filiallarında nümayiş etdirəcək və satış imkanı əldə edəcəklər. Layihənin məqsədi lazımsız hesab edilən əşyaların əlilliyi olan yaradıcı insanların toxunuşu ilə sənət əsərinə çevrildiyini əyani şəkildə göstərmək, tullantıların həcmini azaltmaq, sağlamlıq imkanları məhdud insanların cəmiyyətə inteqrasiyasına dəstək verməkdir.

Növbəti ATMA-YARAT-SAT sosial layihəsi 17-18 avqust tarixlərində 11:00-dan 19:00-a qədər ARAZ supermarketin Bakı şəhəri, Yasamal rayonu Kazım Kazımzadə küçəsi 68/84 ünvanında yerləşən filialında keçiriləcək.