Respublikanın çaylarında və transsərhəd çaylarda mövcud vəziyyət

 Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə ötən günlər ərzində ölkə ərazisində yağan leysan xarakterli yağışlar nəticəsində çaylarda suyun səviyyəsi artıb, Balakən-Şəki bölgəsindən axan Kişçay, Şinçay, Kürmükçay, Baş-Daşğılçay çaylarından, Qəbələ rayonu ərazisindən axan Gorançaydan qısamüddətli daşqın keçib. 
Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 80-120, Kiçik Qafqazın çaylarında 70-180, Lənkəran-Astara bölgəsi çaylarında isə 20-30 faizini təşkil edir.
Tranzit çaylarda hazırki vəziyyət
Oktyabrın 05-də Kür çayının Qıraqkəsəmən məntəqəsində suyun səviyyəsində 3 sm artım müşahidə olunub. Hazırda məntəqədə su sərfi 115 m3/s olmaqla ongünlük normanın 71 faizini təşkil edir. 2014-cü ildə isə bu rəqəm 185 m3/s olmaqla ongünlük normanın 114 faizini təşkil edib. 
Qanıx çayının Əyriçay məntəqəsində suyun səviyyəsində 1 sm artım müşahidə olunub. Hazırda məntəqədə su sərfi 39 m3/s olmaqla, ongünlük normanın 40 faizini təşkil edir. 2014-cü ildə isə bu göstərici 65 m3/s təşkil edərək ongünlük normanın 68 faizinə bərabər olub.
Kür çayının aşağı axınında hazırki vəziyyət
Oktaybrın 05-də Kür çayının aşağı axınında suyun səviyyəsində əsasən artım müşahidə olunub. Belə ki, Kür çayının Surra məntəqəsində və Bankədə 1, Araz çayının Novruzlu məntəqəsində 3 sm artım, Şirvanda 2 sm azalma qeydə alınıb, Salyanda isə suyun səviyyəsində dəyişiklik müşahidə olunmayıb. 
Hazırda Surra məntəqəsində suyun səviyyəsi 318 sm (2014-cü il oktyabrın 05-də 298 sm), Şirvanda 171 sm (2014-cü il oktyabrın 05-də 135 sm), Salyanda 118 sm (2014-cü il oktyabrın 05-də 78 sm), Bankədə 164 sm (2014-cü il oktyabrın 05-də 163 sm), Araz çayının Novruzlu məntəqəsində isə 35 sm (2014-cü il oktyabrın 05-də 23 sm) təşkil edir.