“Möcüzəli su” foto-kollaj müsabiqəsinin mükafatlandırma mərasimi və “Su haqqında” kitabın təqdimatı keçirilib

Ekologiya və Təbii Sərvətlər Nazirliyi, Elm və Təhsil Nazirliyi Respublika Uşaq-Gənclər İnkişaf Mərkəzi və “EkoSfera” Sosial-Ekoloji Mərkəzi İctimai Birliyinin təşkilatçılığı ilə suyun mühafizəsini təşviq etmək məqsədilə bu gün “Möcüzəli su” (“Magic water”) respublika sosial foto-kollaj müsabiqəsinin mükafatlandırma mərasimi və Azərbaycan Respublikasının əməkdar artisti Bəhram Bağırzadənin “Su haqqında” kitabının təqdimatı keçirilib.

Ekologiya və Təbii Sərvətlər Nazirliyinin Ekoloji Maarifləndirmə və İctimaiyyətlə Əlaqələr şöbəsinin müdiri Səyyarə Məmmədova bildirib ki, foto-kollaj müsabiqəsinin keçirilməsində məqsəd sudan qənaətlə istifadə, su resurslarının səmərəli idarə olunması sahəsində uşaq və gənclər üçün maarifləndirmənin artırılmasıdır.

“Müsabiqədə I yerə İbrahim Verdiyev, II yerə Nərmin Qasımlı, Səadət Qasımlı, III yerə Əminə Əsədova layiq görülüb və qaliblər diplomla təltif olunub”.

S.Məmmədova onu da qeyd edib ki, tədbir çərçivəsində Bəhram Bağırzadənin müəllifi olduğu “Su haqqında” kitabında planetimizdə suyun əhəmiyyəti və qorunması, tullantıların su hövzələrini çirkləndirərək ekologiyaya ciddi zərər vurması, eyni zamanda uşaqların suyun qorunması üçün necə kiçik vərdişlərə alışması haqqında tövsiyyələr verilib.

“Sonda Bəhram Bağırzadə imzalı kitablarını tədbir iştirakçılarına hədiyyə edib”.