“Xəzər həftəsi” ilə əlaqədar Sumqayıt şəhərində tədbir keçirilmişdir

“Xəzər həftəsi” ilə əlaqədar 23”“28 sentyabr tarixlərini əhatə etməklə hazırlanmış müvafiq tədbirlər planına uyğun olaraq Sumqayıt şəhərində də ictimaiyyətin maarifləndirilməsinə xidmət edən mədəni-kütləvi tədbirlər keçirilmişdir.
26 sentyabr 2013-cü il tarixində Ekologiya və Təbii Sərvətlər Nazirliyinin mütəxəssisləri tərəfindən ictimaiyyətə su hövzələrinin zənginliyi, dənizin ekoloji cəhətdən saflığının və davamlılığının qorunması, onun sərvətlərinin mühafizəsi, eləcə də bu istiqamətdə görülən işlər barədə ictimaiyyəti maarifləndirmək məqsədilə regional televiziyalarda çıxışlar edilmiş, Sumqayıt şəhərinin 1 və 9 saylı tam orta məktəblərində “Xəzərin ekoloji mühitinin yaxşılaşdırılması istiqamətində görülən işlər” mövzusunda tədbirlər keçirilmişdir.
Eyni zamanda tədbirlər planına əsasən Nazirliyin nümayəndələrinin, yerli bələdiyyələrin, ictimaiyyətin iştirakı ilə Sumqayıt şəhərində Nəsimi parkı ilə Xəzər dənizi arasındakı sahil zolağının 1500 m2 ərazisində iməcilik keçirilmiş və ərazi məişət tullantılarından təmizlənmişdir.
Qeyd edək ki, ETSN tərəfindən “Xəzər həftəsi”nin yüksək səviyyədə qeyd olunması məqsədilə cari ilin 23”“28 sentyabr tarixlərini əhatə etməklə hazırlanmış müvafiq tədbirlər planına uyğun olaraq Respublikanın Xəzərsahili şəhər və rayonlarının orta təhsil müəssisələrində müxtəlif kütləvi maarifləndirici tədbirlər davam etdirilir.