Bayram günləri milli parklarda tədbirlərlə qeyd edilib

“Zəfər Günü” və “Dövlət Bayrağı Günü” münasibətilə Samur-Yalama Milli Parkında “Mənim atam qəhrəmandır" adlı tədbir keçirilib. Milli parkın “Tel bulağı” adlanan marşrutunda keçirilən tədbirdə ölkəmizin ərazi bütövlüyü uğrunda canından keçmiş şəhidlərimizin ailələri, sağlamlığını itirmiş qazilərimiz və övladları iştirak edib.

Digər bir tədbir isə Hirkan Milli Parkında "Dəmirağac meşəsinə səyahət" devizi altında keçirilib. Xanbulan, Parakənd və Daştatük kəndlərinin orta məktəb şagirdləri xüsusi estetik gözəlliyə malik, unikal dəmirağac meşələri ilə yaxından tanış olublar. Uşaqlara mütəxəssislər tərəfindən dəmirağacın xüsusiyyətləri bərədə geniş məlumat verilib.

Eyni zamanda, istirahət günlərində ziyarətçilər təbiətin füsunkar gözəlliklərindən həzz almaq üçün digər milli parkları da ziyarət ediblər.