Samur-Yalama Milli Parkında həftəsonu müxtəlif tədbirlər keçirilib

22 iyul tarixində Ekologiya və Təbii Sərvətlər Nazirliyinin təşəbbüsü, Gənclər və İdman Nazirliyinin təşkilatçılığı ilə Samur-Yalama Milli Parkında gənclər və idmançıların iştirakı ilə tədbir keçirilib.

Tədbirdə Nazirliklərin nümayəndələri, Quba-Xaçmaz Regional Gənclər və İdman İdarəsinin, Xaçmaz rayonu üzrə Gənclər və İdman Sektorunun əməkdaşları, fəal gənclər və idmançılar iştirak edib.

Gənclərin və idmançıların iştirak etdiyi tədbirdə ilk olaraq özünəməxsus təbiəti ilə seçilən və Xəzər dənizini meşə ilə birləşdirən Samur-Yalama Milli Parkının dənizkənarı ərazisində iməcilik keçirilib, sahilboyu ərazi tullantılardan təmizlənib. Daha sonra parkın ərazisində voleybol, şahmat, stolüstü tennis, nərd, taekvondo, boks və karate idman növləri üzrə çıxışlar nümayiş etdirilib, istedadlı gənclərin rəsmlərindən ibarət sərgi təşkil olunub.