“Su mənbələri sənin gözündə” müsabiqəsinin qalibləri mükafatlandırılıb

Su ehtiyatlarının mühafizəsi probleminin həllinə əhalinin cəlb olunmasının vacibliyini nəzərə alaraq Ekologiya və Təbii Sərvətlər Nazirliyi tərəfindən “Su mənbələri sənin gözündə” mövzusuna həsr olunmuş müsabiqə yekunlaşıb.

Təqdim edilmiş 128 fotodan müsabiqə şərtlərinə uyğun gələn 63 foto səsverməyə çıxarılıb.

15 may tarixində Beynəlxalq İqlim Günü ilə əlaqədar Ekologiya və Təbii Sərvətlər Nazirliyində müsabiqə iştirakçılarından ilk 15 yerin müəllifinin iştirakı ilə tədbir keçirilib.

Tədbir zamanı Milli Hidrometeorologiya Xidmətinin şöbə müdiri Fuad Hümbətov tərəfindən iştirakçılara qlobal iqlim dəyişikliyinin ətraf mühitə təsiri, bu sahədə mübarizə metodları mövzusunda məlumatlar verilib, onları maraqlandıran suallar cavablandırılıb.

Tədbirin sonunda “Su mənbələri sənin gözündə” müsabiqəsinin səsvermə nəticələrinə əsasən seçilmiş ilk 15 yerin müəllifinə sertifikatlar, qaliblərə isə mükafatlar təqdim olunub.