Növbəti ağacəkmə aksiyası keçirilib

Ekologiya və Təbii Sərvətlər Nazirliyi, Elm və Təhsil Nazirliyi “Respublika Uşaq-Gənclər İnkişaf Mərkəzi” və "Competo" MMC (Umico) şirkətinin təşkilatçılığı və birgə əməkdaşlığı ilə 15 mart tarixində “Heydər Əliyevin 100 illiyi münasibətilə 100 ağac əkək” aksiyası keçirilib.

Tədbir zamanı 1 nömrəli uşaq evinin şagirdləri üçün yay istirahət zonasında nar, ərik, Eldar şamı və həmişəyaşıl sərv ağacları əkilib. Eyni zamanda, Bakıxanov qəsəbəsində Elm və Təhsil Nazirliyi Uşaq-Gənclər İnkişaf Mərkəzinin bazasında yerləşən 1 hektara yaxın ekopark torpaq sahəsində iməcilik işləri görülüb.

Ağacəkmə aksiyasında Ekologiya və Təbii Sərvətlər Nazirliyinin, Elm və Təhsil Nazirliyi “Respublika Uşaq-Gənclər İnkişaf Mərkəzi” publik hüquqi şəxsin, "Competo" MMC (Umico) şirkətinin əməkdaşları, həmçinin “Yaşıl Şəbəkə” ekoloji maarifləndirmə proqramının ekoklub üzvləri iştirak edib.

Qeyd edək ki, aksiyada 1 nömrəli uşaq evinin şagirdlərinə hədiyyələr təqdim edilib.